TÖREKSOY Xalıqara törki mädäniätläre oyışması tarafınnan 2011 yıl – Tuqay yılı dip iğlan itelde. Böten dönyağa taralğan törki xalıq yıl buyı Tuqay icatı, tatar mädäniäte, ädäbiätı belän yäşäyäçäk.

25 ğinwarda Törkiäneñ Änqara şähärendä, TÖREKSOY oyışmasınıñ töp binasında oyıştırılğan böyek tatar şağire Ğabdulla Tuqaynıñ tuuına 125 yıl tuluğa bağışlanğan tantanada qatnaşuçı Tatarstan deleğätsiäse citäkçese, TR Premer-ministr urınbasarı - mädäniät ministrı Zilä Wäliewa üz çığışında beldergänçä, Tuqay Cayıq (Urälsk) yaqlarına kilgäç, törek ädäbiätı belän qızıqsına, törekçä öyränä başlıy. “Ul Ğosmanlı çorı ädäbiätı belän genä çiklänep qalmıyça, zamandaş yazuçılarnıñ, şağirlärneñ icatları belän dä tanışa. Zıya Paşa, Ğabdulxaq Xämid, Namik Kämal kebek klassik ädiplärneñ äsärlären uqıy. Tuqay härwaqıt Törkiägä barırğa omtılğan. Ämma awırıp kitü säbäple, anıñ xıyalı tormışqa aşmıy qala”, - dip söyläde Zilä Wäliewa.

Tatarstan mädäniät ministrı iskärtkänçä, törki yazuçılarnıñ, citäkçelärneñ burıçı - kiläçäktä dä Törkiägä säyäxätne däwam itep, Ğabdulla Tuqaynıñ ädäbi mirası belän andağı xalıqnı yaqınnanraq tanıştıru.

Törki dönyada böyek şağirebezneñ xäzinäse, şiğerläre tiränten öyränelep betmägän, tieşle däräcädä tärcemä itelmägän äle. Moña üz çığışında Törkiäneñ mädäniät häm turistlıq ministrı Ertuğurul Günäy dä iğtibar yünältte. “Tuqaynıñ törekçägä tärcemä itelgän şiğerlärennän bez qänägät tügel, alarnı yañadan tärcemä itärgä kiräk. Şağirneñ şiğerläre bügen dä asılın cuymağan. Bıyıl törki dönyada Tuqay yılın iğlan itü – anıñ icatın barlap çığu digän süz. Dimäk, anıñ äsärlären tärcemä itärgä forsat çığa. Bez monı başqarıp çığarbız dip uylıym”, - dide ul tantanada yasağan çığışında.

Törkiä citäkçelegeneñ Tuqaynı üzläreneñ klassik ädipläre belän yänäşä quyıp, anıñ icatın öyränügä ciñ sızğanıp alınuı tatarlarnı bik söyenderä. Töreklär genä tügel, bik küp törki millätlär şağir aldında baş iä. TÖREKSOY oyışmasınıñ generäl särqätibe Düsen Qäsienov üz çığışında tanılğan qazax ädibe Sabit Muqanovnıñ mondıy süzlären kiterde: “Tuqay ber çorda da asılın yuğaltmıy, sünmi torğan klassik bulıp qalaçaq”.

Alsu Xäsänowa